[ad_1]
ವಿಶೇಷವಾಗಿ ಬೆಂಗಳೂರಿನಂತಹ (Benngaluru) ಮಹಾನಗರಗಳಲ್ಲಿ ಇಂದು ಹೆಚ್ಚಿನ ಜನರು ಬಾಡಿಗೆ ಮನೆಗಳಲ್ಲೇ ವಾಸಿಸುತ್ತಿದ್ದಾರೆ. ಹೆಚ್ಚಿನ ಶಿಕ್ಷಣಕ್ಕಾಗಿ, ಉದ್ಯೋಗ ಅರಸಿ ನಗರಕ್ಕೆ ಬಂದಿರುವುದರಿಂದ ಅಥವಾ ಸ್ವಂತ ಮನೆ ಖರೀದಿಸಲು ಸಾಧ್ಯವಾಗದ ಕಾರಣ ಹೀಗೆ ಅನೇಕ ಕಾರಣಗಳಿಗಾಗಿ ಜನರು ಬಾಡಿಗೆ ಮನೆಗಳಲ್ಲಿ ವಾಸಿಸುತ್ತಾರೆ. ಬರುವಾಗಲೂ ಏನೂ ಕೊಂಡು ಬರಲ್ಲ, ಹೋಗುವಾಗಲೂ ಕೊಂಡು ಹೋಗಲ್ಲ ಅನ್ನೋ ಬಹುತೇಕರು ಮನೆ ಅಂತ ಒಂದಿದ್ದರೆ ಸಾಕೆಂದು ಬಾಡಿಗೆ ಮನೆಗಳಿಗೆ ತೆರಳುತ್ತಾರೆ. ಆದ್ರೆ ಭೂಮಿಯ ಮೇಲೆ ಒಂದು ಸ್ಥಳವಿದೆ, ಅಲ್ಲಿ ಸಾವಿನ ನಂತರವೂ ಮನೆಗಳನ್ನ ಬಾಡಿಗೆಗೆ ಪಡೆಯಬಹುದಾಗಿದೆ.
ಹೌದು.. ಬದುಕಿರುವಾಗ ಜೀವನಕ್ಕಾಗಿ ಮನೆ ಬಾಡಿಗೆ (Rent House) ಪಡೆಯುವಂತೆ ಈ ಒಂದು ಪ್ರದೇಶದಲ್ಲಿ ಸತ್ತಮೇಲೆ ಅಂದ್ರೆ ಸಮಾಧಿಗಳನ್ನು ಬಾಡಿಗೆಗೆ ಪಡೆಯಬಹುದಾಗಿದೆ. ಅಷ್ಟಕ್ಕೂ ಈ ವಿಚಿತ್ರ ಸಂಸ್ಕೃತಿ ಇರುವುದು ಎಲ್ಲಿ? ಸಮಾಧಿಗಳನ್ನ ಹೇಗೆ ಬಾಡಿಗೆಗೆ ನೀಡಲಾಗುತ್ತೆ? ಎಷ್ಟು ವರ್ಷಗಳ ವರೆಗೆ ಮೃತದೇಹಗಳನ್ನ ಸಂಗ್ರಹಿಸಬಹುದು? ಎಂಬುದನ್ನು ತಿಳಿಯಬೇಕಿದ್ದರೆ ಮುಂದೆ ಓದಿ…
ಬಾಡಿಗೆ ಸಮಾಧಿ ಎಲ್ಲಿ ಸಿಗುತ್ತೆ?
ವಿಶ್ವದಲ್ಲೇ ಅತಿದೊಡ್ಡ ಬಾಡಿಗೆ ಸ್ಮಶಾನ ಬೊಲಿವಿಯಾದ ಲಾ ಪಾಜ್ ಪ್ರದೇಶದಲ್ಲಿದೆ, ಇದರ ಹೆಸರು ಸಿಮೆಂಟಾರಿಯೋ (Cementerio General). ಜನರು ತಮ್ಮ ತಮ್ಮ ಕುಟುಂಬ, ಸಂಬಂಧಿಕರ ಅಂತ್ಯಕ್ರಿಯೆಗಳಿಗಾಗಿ ಮತ್ತು ಅಂತ್ಯಕ್ರಿಯೆ ಬಳಿಕ ಚಿತಾಭಸ್ಮ ಸಂಗ್ರಹಕ್ಕಾಗಿ ಇಲ್ಲಿ ಸಮಾಧಿಗಳನ್ನ ವರ್ಷಾನುಗಟ್ಟಲೇ ಬಾಡಿಗೆಗೆ ಪಡೆಯುತ್ತಾರೆ. ಸಿಮೆಂಟಾರಿಯೋ ಪ್ರತಿ ವರ್ಷ 50,000 ಶವಗಳನ್ನ ನಿರ್ವಹಿಸುತ್ತದೆ.
ಅಂತ್ಯ ಸಂಸ್ಕಾರ ವಿಧಾನ ಹೇಗೆ?
ಸಿಮೆಂಟಾರಿಯೋದಲ್ಲಿ 2 ರೀತಿಯ ಅಂತ್ಯ ಸಂಸ್ಕಾರಗಳಿಗೆ ವ್ಯವಸ್ಥೆ ಮಾಡಲಾಗಿದೆ. ಶವಗಳನ್ನ ಪಾಶ್ಚಿಮಾತ್ಯ ಸಂಸ್ಕೃತಿಯಂತೆ ಹೂಳುವುದು ಅಥವಾ ರಹಸ್ಯ ಸ್ಥಳದಲ್ಲಿ ಪಾರ್ಥೀವ ಶರೀರ ಇಡುವುದಾಗಿರುತ್ತದೆ. ರಹಸ್ಯವಾಗಿ ಇಡಲಾದ ಶವಗಳನ್ನ 10 ವರ್ಷಗಳ ವರೆಗೆ ಇಡಬಹುದಾಗಿದೆ. ಬಳಿಕ ಅದನ್ನ ಹೊರತೆಗೆದು ದಹನ ಮಾಡಲಾಗುತ್ತದೆ. ದಹನದ ಬಳಿಕ ಕುಟುಂಬಸ್ಥರಿಗೆ ಅಥವಾ ಪಾರ್ಥೀವ ಶರೀರದ ವಾರಸುದಾರರಿಗೆ ಚಿತಾಭಸ್ಮ ಮತ್ತು ಮೂಳೆಗಳನ್ನ ನೀಡಲಾಗುತ್ತದೆ.
ಈ ಚಿತಾಭಸ್ಮ ಮತ್ತು ಮೂಳೆಗಳನ್ನು ಸಂಗ್ರಹಿಸಲು ಸ್ಮಶಾನದ ಗೋಡೆಗಳಲ್ಲಿ ಸಣ್ಣ ಸಣ್ಣ ಗೂಡುಗಳು ಮತ್ತು ಗಾಜಿನ ಕಮಾನುಗಳನ್ನ ನಿರ್ಮಿಸಿಸಲಾಗಿದೆ. ಇದು ಸುಮಾರು 3-4 ಅಂತಸ್ಥಿನ ಅಪಾರ್ಟ್ಮೆಂಟ್ಗಳನ್ನೇ ಹೋಲುವಂತಿದ್ದು, ಅವುಗಳನ್ನೂ ಬಾಡಿಗೆಗೆ ಪಡೆಬಹುದಾಗಿದೆ.
ಸತ್ತಮೇಲೂ ನಂಟು!
ಇಲ್ಲಿನ ಸಮಾಧಿಗಳಲ್ಲಿ ಬಹುಕಾಲದ ವರೆಗೆ ಚಿತಾಭಸ್ಮ ಸಂಗ್ರಹ ಮಾಡುವುದರಿಂದ ಅವರು ನಮ್ಮೊಂದಿಗೆ ಬಹುಕಾಲದ ವರೆಗೆ ಇರುತ್ತಾರೆ ಅನ್ನೋದು ಇಲ್ಲಿನ ಜನರ ನಂಬಿಕೆ. ಆದ್ದರಿಂದಲೇ ಚಿತಾಭಸ್ಮ ಸಂಗ್ರಹಿಸಿದ ಆ ಗೂಡುಗಳ ಬಳಿ ಪ್ರತಿದಿನ ಬಂದು ನೀರು, ಆಹಾರ, ಹೂವುಗಳನ್ನಿಟ್ಟು ಕೆಲಕಾಲ ಅಲ್ಲಿ ಕುಳಿತು ಗೊಣಗುತ್ತಿರುತ್ತಾರೆ.
ಲಕ್ಷಾಂತರ ರೂಪಾಯಿ ಬಾಡಿಗೆ
ಬೊಲಿವಿಯಾದರೋ ಅತಿದೊಡ್ಡ ಸ್ಮಶಾನವಾದ ʻಸಿಮೆಂಟಾರಿಯೊʼನಲ್ಲಿ ಸ್ಮಶಾನ ನಿರ್ವಹಣೆಯು ಬಹು ಕೋಟಿ ಡಾಲರ್ ವ್ಯವಹಾರವಾಗಿದೆ. ಸುಮಾರು 210 ಎಕರೆ ಪ್ರದೇಶದಲ್ಲಿರುವ ಈ ಸ್ಮಶಾನದಲ್ಲಿ 20 ಲಕ್ಷ ಶವಗಳ ಅವಶೇಷಗಳನ್ನ ಸಮಾಧಿ ಮಾಡಲಾಗಿದೆ. ಪ್ರತಿ ವರ್ಷ 50 ಸಾವಿರ ಶವಗಳನ್ನ ನಿರ್ವಹಣೆ ಮಾಡಿ, ನಂತರ ದಹನ ಮಾಡಲಾಗುತ್ತದೆ.
ಜನರು ಇಲ್ಲಿ ಶವಗಳನ್ನ ಹೂಳಲು ಮೊದಲು 5 ವರ್ಷಗಳ ಕಾಲ ಗುತ್ತಿಗೆಗೆ ಪಡೆಯುತ್ತಾರೆ. 5 ವರ್ಷಗಳ ನಂತರ ಪ್ರತಿ ತಿಂಗಳು ಅಥವಾ ವಾರ್ಷಿಕದಂತೆ ಬಾಡಿಗೆ ಪಾವತಿಸಬೇಕಾಗುತ್ತದೆ. ಬಾಡಿಗೆ ಪಾವತಿ ವಿಳಂಬವಾದ್ರೆ ಮೊದಲು ನೋಟಿಸ್ ನೀಡಲಾಗುತ್ತೆ. ಅದಾಗಿಯೂ ನಿಗದಿತ ಸಮಯದಲ್ಲಿ ಸಮಾಧಿಯನ್ನ ತೆರವುಗೊಳಿಸದಿದ್ದರೆ, ಹೂತ ಶವಗಳನ್ನ ಕಿತ್ತೆಸೆಯಲಾಗುತ್ತದೆ. ಆದ್ದರಿಂದಲೇ ಇಲ್ಲಿನ ಜನ ಸ್ಮಶಾನದ ಗೋಡೆಗಳಲ್ಲಿರುವ ಕಮಾನು ಅಥವಾ ಗೂಡುಗಳನ್ನ ಬಾಡಿಗೆಗೆ ಪಡೆದು ಚಿತಾಭಸ್ಮ ಮತ್ತು ಮೂಳೆ ಅವಶೇಷಗಳನ್ನ ಸಂಗ್ರಹಿಸುತ್ತಾ ಬರುತ್ತಿದ್ದಾರೆ. ಕೆಲವರು ಪ್ರತಿದಿನ ಬಂದು ಅವುಗಳೊಂದಿಗೆ ಮಾತನಾಡುತ್ತಾ ತಮ್ಮ ನೋವು ಹಂಚಿಕೊಂಡರೆ, ಇನ್ನೂ ಕೆಲವರು ವರ್ಷಕ್ಕೊಮ್ಮೆ ಬಂದು ಗೌರವ ಸಲ್ಲಿಸುತ್ತಾರೆ.
[ad_2]
Source link publictv.in
Leave a Reply